كتب- إسلام محمد:
 
عامان بالتمام والكمال لم تر فيهما ابنتا الحوامدية "سارة ورنا عبد الله الصاوي" الشمس، بعد أن لفقت لهما نيابة الانقلاب تهمة المشاركة في قتل جندي بسفارة النيجر، وهي التهمة التي أعلنت اخلية الانقلاب أنها ألقت القبض على مركبيها قبل أن يتم القبض على سارة ورنا بأربعين يومًا كاملة.
 
سارة الصاوي، طبيبة نساء وتوليد بمستشفى البدرشين المركزي، ورنا صيدلانية وتعمل بإى شركات الأدوية، ومنذ اعتقالهما تعانيان من انتهاكات جسيمة، أقلها حبس الحرية والسجن دون جريمة. في السطور التالية نتعرف على تفاصيل جريمة اعتقال الطبيبة والصيدلانية من خلال التدوينة التي نشرها شقيقهما"عبدالرحمن" على صفحته بموقع "فيس بوك":
 
 
طيب نرجع نقول كمان.. 
 
سارة عبدالله عبدالمنعم الصاوي.. ٢٩ سنة.. طبيبة نسا وتوليد بمستشفى البدرشين العام..
 
رنا عبدالله عبدالمنعم الصاوي.. ٢٧ سنة.. دكتورة صيدلانية في إحدى شركات الصيدلة في مدينة نصر..
 
اتقبض عليهم يوم ١٧-٩ هما ووالدي من طريق مصر اسكندرية الصحراوي وتم احتجازهم في قسم العامرية لمدة ٥ ساعات بعد كدة راحوا على مقر امن الدولة في الشيخ زايد.
 
قعدوا في أمن الدولة لمدة ٥ أيام منعرفش عنهم حاجة واتعرضو على نيابة أمن الدولة في التجمع ووقتها كان محاميين اللي معيناهم النيابة عشان يدخلو يعملو منظر كدة معاهم عشان يتقال ان العرض تم بشكل قانوني قالولهم بالحرف اعترفو على نفسكم بكل حاجة وبعد كدة ربنا يسهل. 
 
إخواتي اتعرضو في الـ٥ أيام دول للاعتداء بالضرب والشتيمة والكهربا والتهديد بالاعتداء الجسدي لو معترفوش بالاتهامات المتوجهة ليهم وكان بيتقالهم وهما رايحين النيابة " انتو راجعينلنا تاني " ودة تهديد بانهم لو مقالوش اللي هما عايزينه هيتم الاعتداء عليهم بابشع الطرق في امن الدولة 
 
والدي سنه كان ٦٨ سنة واتضرب واتشتم واتهان وكان متغمي طول ال ٥ ايام في امن الدولة بعد كدة " اترمى " على الطريق الصحراوي وهو ميعرفش مصيره ولا مصير بناته ايه 
 
الاتهامات المتوجهة ليهم الاشتراك في " خلية الحوامدية " وقتل عسكري عند سفارة النيجر وحيازة سلاح والانضمام لداعش 
 
 
 
وهما ملهومش علاقة باي حاجة من اللي فوق دي اساسا .. 
 
أختي رنا اتعرضت للتهديد بالقتل والظابط اللي كان بيحقق معاها كان حاطط الطبنجة على راسها وبيقولها " هقتلك" بالكلمة .. 
 
دة لينك لفيديو كانت نزلته وزارة الداخلية قبل ما اخواتي يتقبض عليهم بـ٤٠ يومًا انهم قبضو على اللي عملو الواقعة وبالعربية بتاعتهم نفس التهمة اللي اتوجهت لاخواتي بعدها بـ٤٠ يومًا بعربية تانية ومتهمين تانيين
 

 
اخواتي بقالهم حوالي سنتين محبوسين وبيتجددلهم على تهم هما مرتكبوهاش ولا ليهم علاقة بيها 
 
كل اللي بنطلبه ان الناس تتكلم عنهم وتنشر قضيتهم يمكن دة يكون سبب ان ربنا يفرج كربتهم ويرجعو يعيشو حياتهم الطبيعية في شغلهم وحياتهم بشكل عام .. 
 
#الحرية_لسارة_ورنا 
#الحرية_للبنات

رابط دائم