رامي ربيع
بثَّ الفنان عبد الله الشريف آخر إبداعاته، عبر صفحته على "فيس بوك"، بعنوان "السكة شمال في شمال".

وقال الشريف، خلال الحلقة: إن "كل الأجيال اللي قبلنا كان لها حكاية من جهة واحدة تحكيها عن الماضي، ودائما الحكاية دي كانت تبدأ بجملة من اثنتين ملهمش ثالث، يا إما وأنا في سنك كنت كذا وكذا، أو على أيامنا كان بيحصل كذا وكذا، إلا الجيل ده تحديدا هيبقى عندنا حكايتين عن كل حاجة تقريبا، وكل حكاية حتبقى عكس التانية، حكاية يمين وحكاية شمال في شمال".

وأضاف الشريف أن "اللي حصل للمجتمعات العربية خلال الكام سنة دول مش تغيير دا تجريف لكل ثقافاتنا ومعتقداتنا.. التغيير ده ممكن يحس بيه واحد كان مسافر الكام سنة دول ورجع دلوقت، أو واحد كان في غيبوبة طويلة وفاق منها، أما إحنا عشان جوه المر وبناخد منه معلقة مش مصدومين قوي".

وتابع الشريف "حنقول لأحفادنا مثلا على أيامنا الشيخ كان بيقرأ قرآن وبعد الظهر كان بيغني، حنقولهم الحجاب والنقاب كانوا من الدين، وبعدين اكتشفنا أنهم مش من الدين، حنكلمهم عن منظومة التعليم والأساطير اللي خرجت من جامعاتنا وبعدين هنفرجهم على وزارة التربية والتعليم".

واستطرد الشريف "هنوريهم صور رجالة عرفناهم من أيام الأبيض والأسود، وشوية صور تانية بالألوان، هنفتخر قدامهم أن جيلنا طلع منه أمير القلوب وصانع البسمة، وبعدين نتبرأ منه عشان لا مؤاخذة طلع إرهابي، والأمثلة من ده أكثر من الهم على القلب".

رابط دائم